فقاقيع كلام

فقاقيع بتطير في الهوا..وفقاقيع مفقوعة من اللي افترا فقاقيع روز..فقاقيع وردي..وفقاقيع سودا في داهية تودي

يااااه.. بقالي كتير مدونتش..
كان عندي ضغط كتييييييييييير
ودلوقتي رميت جزء من الضغط نسبيًا
وهوووب سافرت على اسكندرية.....وبدأت
وبدأت الأفكار التدوينية تنهال عليا من أول ما ركبت
الميكروباص من القاهرة وإلى الإسكندرية.. حاجات كتيييير
لفتت نظري إن المصرين أكتر ناس تعمل حوارات ..
تلاقي مثلا الفكهاني كاتب على التفاح 2 جنيه تقرب شوية تلاقيه بـ 2.99
تركب الميكروباص وبعد ما تختار مكان وترتاح فيه وحبذا لو جنب الشباك
وتفضل منتظر الميكروباص يتملي وبعد مايتملي تلاقي السواء يقولك
الأجرة بـجنيه يا أفندية في حين إنها .75قرش مثلا!!
تقرأ في أي قسم شرطة (الشرطة في خدمة الشعب) المفروض بدون مقابل..
لكن الحقيقة غير كدة خااالص المتهم والمجني عليه بيدفعوا ويرشوا
بالجاامد عشان الموضوع يتمرر ويظبطوا القضية على مزاجهم!!
في التليفزيون يقولوا الكادر الكادر الكادر وكل مدرس هيحقق اللي نفسه
فيه شقة وعربية ووو...وبعد ماالمدرسين يفرقوا شربات على الكادر
تلاقي الدخل الزيادة أدفع في حاجات تانية ومن ضمنهم الشربات اللي فرقوه
لأن الحكومة غلت سعره لما زاد الطلب عليه...
تقرأ القانون تلاقيه بيقول إرهاب وفي الحقيقة ممكن تلاقي جدك سحبينه
على المعتقل في حين إنه ميعرفش يعني إيه إرهاب!!!
هي ليه كل الناس بتستغل بعض بالشكل ده
الناس بتشتكي بعضيها ليه؟؟؟؟؟؟؟؟؟
تلاقي واحد بيلعن شخص أستغله وهو نفسه بيستغل الناس
هو إحنا هنفضل كدة كتير؟؟؟
كل اللي فات ده بيحسس أي حد إن مفيش ثقة
مفيش أمان
مفيش خير
مفيش طيبة
تفتكروا القلة المعترضة تقدر تغير حاجة؟؟؟
المفروض الواحد كان يتكلم عن البحر وجمال البحروسحر البحر.. لكن المتعوس متعوس

7 أكيد في تعليق عايز تقوله:

بصى يا فقوعة
الازدواجية فى تقييم الأمور دا سبب رئيسى فى انا بنحكم على الاشياء لصالحنا بس
عدم احترام الاخر
سبب اخر
عدم احترام دينا
كمان مفيش ثقة بالنفس
تلاقى كل شىء بينهار دا إن مكنش منهار
المشكلة تكمن فى كيفية سيطرة الإنسان على نفسه فى ظل هذه المتغيرات الرهيبة
وازاى اتأكد انى مش بعمل كده وانى مش مع التيار
صعب شوية

أعتقد إن المشكلة إن الناس بئه عندها ظن السوء في التصرفات هو الأول وعدم الثقة في الأخر

وده طبعا مش من فراغ , يعني بصراحة الله يكون في عون الناس برده , اللي بيشوفوه مش قليل
الجو العام يخنق بصراحة أي حاجة جميلة ممكن تتولد , والجو العام برده وفي ظل غياب تربية إسلامية صحيحة على القيم ,يساعد على ذلك

يعني لو الناس كانت على سبيل المثال معندهاش ضمير والحاجة غليت مثلا , هتلاقي كل واحد بيحاول يعوض فرق الغليان ده وكل واحد بطريقته بقه

وطبعا مش كل الناس كده علشان منعا للفهم الخاطئ
ودمتي أختنا الفاضلة بكل خير
وجزاكم الله خيرا

امبارح رايح أركب ميكروباص لقيت واحد بينادي
طنطا جنيه وربع بس

قلت سبحان الله ..يعني لو بجنيه الواحد يروح المنصورة وخلاص

أقصد لو بجنيه ونص:)

حسبى الله ونعم الوكيل
اختى
فقد ذكرتى متناقضات صحيحة وبلدنا للأسف بقت بلد الشقاليب والتحوير
السلام عليكم

حورارت ايه دي اسمها اشتغالات
يعني اقولك مرتبك هيزيد خمسين جنيه وازود لك الاسعار تحتاج 100 جنيه فوق الخمسين طبعا ما احنا في بلد بيحكمها شلة رجال اعمال حرامية واحد بعد ما كسب مليارات من الحديد بيدور دلوقت عشان يحتكر الاسمنت ايه الهبل ده
هو احنا شعب ساذج اوي كده ولا احنا اللى بنقبل فبيضغطوا علينا اكتر

سجدة

بيدو

أزر سانكس

مؤمن

بيدو
ـــــــــــــــ

بالإضافة لكلامكم

والله الواحد مش عارف يلاقيها

أنا أعزبة ولا أعول ولكن المصاريف

بتبقى كتير عليا جدًا جدًا والله المواصلات

و.. و..و...و.....

فلوس كتير بتروح في حاجات بسيطة

تعبت بجد الله يكون في عون من يعول

ــــــــ
جزاكم الله خيرا على مروركم

ونورتوا الفقاقيع بجد

إرسال تعليق

أنا مين؟؟؟

صورتي
Egypt
مصرية مسلمة وأخت في الله .. أعمل بإدارة الموارد البشرية.. وبحب السما والبحر والنجوم والشجر والأطفال والألوان والفجر والغروب والشعر والقراءة والتأمل.. وبحب ماليزيا وأنا من مصر ونفسي أموت في مكة وبحب اسكندرية وأنا من القاهرة ونفسي أزور القدس..

About this blog







Recent News

حكم يومية


ـــــ فقاقيع كلام ـــــ شروق الشمس