فقاقيع كلام

فقاقيع بتطير في الهوا..وفقاقيع مفقوعة من اللي افترا فقاقيع روز..فقاقيع وردي..وفقاقيع سودا في داهية تودي


وعادت الأمتحانات والله المستعان
وقبل الامتحانات كان عندي ضغط شغل..سبحان الله
كل سنة يحصل كدة وقت الامتحانات بالأخص ألاقي أكوام من المهام
يعني من غيابي عن التدوين بسبب العمل إلى غيابي بسبب الامتحانات
لعله خير إن شاء الله..
المهم إن الغالبية أعتقد إنهم مشغولين في الفترة دي زيي
وبالرغم من كدة هسيب كام سؤال على الماشي بمناسبة الامتحانات
وأكيد مش كل الناس بتمتحن في الوقت ده في مدونين كتييييير خلصوا دراسة
عشان كدة عاوزين نعرف ذكريات الناس عن الامتحانات والمواقف اللي مش هتتنسي
من خلال الكام سؤال دووووول
أول أمتحان في حياتك وحسيت إنه أمتحان صعب فعلا؟
أكتر مرة خوفت فيها من أمتحان.. وكان إيه السبب؟
أطرف موقف حصلك في الامتحان؟
أتأخرت مرة في حضور امتحان.. طب عملت إيه؟
كفاية كدة.. وأراكم ناجحين إن شاء الله

10 أكيد في تعليق عايز تقوله:

لا خدي بالك من مذاكرتك يا جميل :)

ربنا يوفقك يا رب

وحشاني فعلا يا بنوتة

أول أمتحان في حياتك وحسيت إنه أمتحان صعب فعلا؟

يا خبر .. أجيبلك الذكرى دي منين بقى :D

لا مش فاكرة بس كل سنة بيكون فيها امتحانات صعبة بس عمر ما واحده علقت بذهني يعني

أكتر مرة خوفت فيها من أمتحان.. وكان إيه السبب؟

في ثالثة ثانوي .. السنة اللى قبل الثانوية عامة عندنا في الكويت

كانت سنة ما يعلم بيها إلا ربنا .. بجد كانت مقرفة جدا وصعبة جدا أصعب من ثانوية عامة نفسها .. وكنت من كتر خوفي بطني بتلالي معايا .. بجد كان بيجيلي مغص شديد .. وكنت بنام قليل .. وكنت من الخوف فعلا بروح احضن ماما .. يااا ستير يا رب .. دي كانت سنة الله ما يعيدها علينا أبدا :D



أطرف موقف حصلك في الامتحان؟

ثانوية عامة .. شفنا صرصار في اللجنة .. كنت على وشك إني أعيد الثانوية في الحادثة دي من الرعب .. وأختك يا بنتي أجارك الله عندها رعب من الحشرات لا يوصف

أتأخرت مرة في حضور امتحان.. طب عملت إيه؟

اه كام مرة بس تأخير بسيط ربع ساعة بالكتير .. وكنت بحلم بالحكاية دي كمان من كتر ما كنت مرعوبة منها .. وعادي كنت بدخل وامتحن :)

ذاكري كويس .. ربي أشوفك من المتفوقين

دي بس عشان أشترك في الإبلاغ البريدي :D

أول أمتحان في حياتك وحسيت إنه أمتحان صعب فعلا؟
كان امتحان في أولى هندسة وكان عدد الأسئلة كبير جدا واحنا مش كنا عارفين إن الدكتور بيصحح من أعلى واحد يحل بس اتفاجأت إني جبت جيدجدا رغم إني حليت 6 من 12 سؤال
أكتر مرة خوفت فيها من أمتحان.. وكان إيه السبب؟
امتحان مادة هندسة الانتاج في إعدادي هندسة (خدي بالك كل اللي قبل كدة كنت باتسلى بالامتحانات)
مادة الإنتاج كانت نظرية شوية في وسط المواد بتاعتنا وانا ما كنتش حافظ حاجة خالص بس ربنا ستر
أطرف موقف حصلك في الامتحان؟
امتحان ثانوية عامة مادة الميكانيكا(1985) كان 8 أسئلة تحل منهم ستة حليت الثمانيةفي نصف الوقت وطلعت والنسا كانت بتطلب وقت فاجتمع مجموعة منهم وتربصوا بمطاوي ليا تاني يوم
بسبب إني أبطلت طلبهم للوقت

أتأخرت مرة في حضور امتحان.. طب عملت إيه؟

لما صحيت من النوم وكان في وقت بداية اللجنة بعدها تقريبا بخمس دقائق ولسة قدامي حوالي ثلث ساعة على الكلية
قعدت البس الشراب بهدوووووء شديد وبعدين قلت لنفسي لو ربنا أراد إنك تسقط ما كانش صحاك من النوم وفعلا رحت حليت كويس جدا
كفاية كدة.. وأراكم ناجحين إن شاء الله

ربنا يوفقك

عايزة ذكريات امتحنات :(

في سنة رابعه كلية ليه الامتحان كانعندي جرح في رجلي واتفتح وبسبب اني رحت الامتحان اتلوث الجرحواضطريت اعمل عمليه تاني فيه ..

السنة اللي بعدها كنت بعيد رابعه علي نفس المادة قبلها بيومين جدتي اتوفت ..

في بلاوي كتير مصاحبة للامتحنات

المهم ربنا يعينك ويعنا جميعاً

اول امتحان ؟

مممممممممممممم

يا حبيبتى الذاكرة خربت من الاكل الفاسد

اكثر مرة خوفت فيها ؟؟

انا كنت طول عمرى من ايام ثانوى وانا الامتحانات دى بكون فيها آخر روقان واعصاب تمام

انما فى اخر سنة ليا فى الكلية كان فيه مادة الدكتور كان مطلع عينيا طول التيرم اساسا

المادة العلمية اللى نذاكرها كانت متشعبة وكتيرة

المهم دى كانت المادة الوحيدة اللى كنت خايفة منها وشايلة همها

لدرجة انى لما خرجت من امتحانها عيطت

اصحابى مش كانوا مصدقين

يلا اهى ايام وعدت

اظرف موقف ؟؟

ممممممممم

لا مش فاكرة

اتاخرت ؟؟

اة اتاخرت مرة على امتحان 20 دقيقة

مش عملت حاجة غير انى جريت على السلالم عشان اوصل للجنة

لانى مش اكتشفت انى اتاخرت غير لما وصلت للكلية وبصيت فى الساعة اللى متعلقة فيها

بس الحمد لله عدت ولا كأن كان فيه حاجة

عزيزي صاحب المدونة
عزيزتي صاحبة المدونة
========================
نتشرف بدعوتك لافتتاح
دار الكتب
هي حلم صاحب البوابة الذي تحقق
طريقة مبتكرة لتوثيق الكتب العربية و نشرها بين الناس بكل سهولة و يسر والدمج بين دور النشر المختلفة لسهولة البحث لاي قارىءوالنشر لاي كاتب
الافتتاح يوم الخميس 10-1-2008
في مكتبة البلد 31 شارع محمد محمود امام الجامعة الامريكية
الساعة السادسة مساءا
يلا نشارك مصطفى فرحته بتحقيق الحلم

الأول بعتذر عن غيابي عن الزيارة
وأنا عارف إن العذر مقبول بإذن الله

ثانيا ربنا يوفقك ويكرمك إن شاء الله وترجعي بالسلامة وترفعي علم مصر بأعلى الدرجات إن شاء الله

ثالثا : وبالنسبة للأسئلة إللي حضرتك كتبتيها :

السؤال الأول : أول إمتحان في حياتي مش هوه اللي حسيت إنه صعب لأني كنت من الناس اللي مبيخافوش من الحاجات دي علشان تقريبا لا أذكر لكنه وكالعادة كان في الصف الأول الإبتدائي
لكن الإمتحانات اللي كنت حاسس إنها كانت صعبة أو كنت مهتم بيها في سنة تالتة كلية .

الثاني : الموقف اللي تقريبا فاكره بس مش معايا ولكن حصل قدامي
كان في امتحان الألماني في ثانوية عامة وكان عندنا واحد أبوة اشترى له اللجنة وبعدين في يوم الإمتحان بتاع الألماني ده الموضوع كان معصلج شوية والمراقبين مكنوش عارفين يدخلوله ورق الإجابة فالمراقب قاله إعمل أي حاجة لحد لما يجيبوله ورق الإجابة من بره علشان الوقت قرب يخلص ..
صاحبنا سطر الورقة وبعدين كنا تقريبا كلنا خلصنا إجابة وبنراجع ولقينا صاحبنا بيسأل المراقب أنقل التوصيل من ورقة الأسئلة لورقة الإجابة إزاي ..؟ المراقب سألنا ورفع ورقة صاحبنا لفوق , كانوا جايبين لنا موضوعين تعبير بالألماني على هيئة عناصر مكتوبة بالطول وبين الموضوعين خط فاصل , صاحبنا لأنه لا يفقه حاجة في الألماني افتكره توصيل , طبعا اللجنة هاصت والناس ماتت على نفسها من الضحك وبقه صاحبنا حديث الساعة ايامها

أم السؤال الثالث : بصراحة لم أتأخر ولا مرة عن إمتحان ده أنا يمكن كان أحيانا أنام بصعوبة ليلة الإمتحان وأصحى بدري قبل الإمتحان خوفا من إنه يفوت ولا حاجة

وفقكم الله

وأسف على الإطالة

وبعتذر عن التأخير مرة أخرى

دمتم في رعاية الله

وجزاكم الله خيرا

ربنا معاكي ذاكري وركزي. اول امتحان وحسيت انه صعب فعلا كانت الابتدائيه علشان مراقبين جداد ومدرسه غير مدرستي اكثر مرة خوفت فيها صراحه عمري ما خفت مكنش بيهمني اطرف موقف حصلك في الامتحان في امتحان اللغه الفرنسيه في الصف الثالث السنوي وكان صعب جدا ومحدش عارف يحل حاجه وفجاءة جيه هوا جامد جدا فتح كل الشبابيك وطير كل الاوراق اللي خارج اللجنه داخلها وكان من نصيبي كتاب خارجي للغه الفرنسيه طبعا المراقب قعد يضحك وقالي هديتك جتلك من السما يله اللي مش عارف حاجه ياخدها اتاخرت مرة في حضور الامتحان عمري لان والدتي كانت مبتنمش يوميها بس انا كنت بنام طبعا ههههههه

الحمد لله خلصت امتحانات مكنتش اعرف ان فيه هنا اسئله ماصدقنا خلصنا
ما علينا
أول أمتحان في حياتك وحسيت إنه أمتحان صعب فعلا؟
مش فاكرة بصراحه

أكتر مرة خوفت فيها من أمتحان.. وكان إيه السبب؟
في سنة تانية امتحان الحيوان السبب انه عامل كابوس ليا ولغاية انهارده

أطرف موقف حصلك في الامتحان؟
اطرف او ممكن اغبى دخلت امتحان شفوي والدكتور بيفكر ويقولي اسألك في ايه قلتله اختار انا قالي اختاري جيت اختار نسيت كان سؤال سهل من النظري بس نسيته بقيت واقفه زي اللي لسه بيتعلم القراءة ومش عارفه اجمع الكلام خالص قالي اكتبي نسيت الحروف نسيت كل حاجة
بس الحمد لله كان دكتور طيب قالي خليكي شوية استنيت في الاخر وسألني والحمد لله جاوبت وقالي كويس طيب كان مالك

أتأخرت مرة في حضور امتحان.. طب عملت إيه؟
لا محصلتش الحمد لله
وشكرا

اريد المشاركة في المنتد

إرسال تعليق

أنا مين؟؟؟

صورتي
Egypt
مصرية مسلمة وأخت في الله .. أعمل بإدارة الموارد البشرية.. وبحب السما والبحر والنجوم والشجر والأطفال والألوان والفجر والغروب والشعر والقراءة والتأمل.. وبحب ماليزيا وأنا من مصر ونفسي أموت في مكة وبحب اسكندرية وأنا من القاهرة ونفسي أزور القدس..

About this blog







Recent News

حكم يومية


ـــــ فقاقيع كلام ـــــ شروق الشمس