فقاقيع كلام

فقاقيع بتطير في الهوا..وفقاقيع مفقوعة من اللي افترا فقاقيع روز..فقاقيع وردي..وفقاقيع سودا في داهية تودي

كثيرً ا ما كتبت أني سأعود مجددًا للتدوين
ولكن تشغلني أمور كثيرة فتحول بيني وبين الرجوع
ومن أهم هذه الأمور ثورة يناير.. التي أحدثت حالة من التنفس للشعب
وبعد كل هذه الفترة، وهذه التغييرات والانقلابات بحياتي .. إن شاء الله أعود للتدوين 
وبعدما وجدت من خلال التقارير أن هذه المدونة مازال يشاهدها الكثير.. سعدت جدا لذلك
وهذا حافز جيد للتدوين.. شكرًا لكم.. ودعواتكم :)

السلام عليكم ورحمة الله وبركاته
اليوم السبت 29-5-2010
قررت أن أعود مجددًا إلى التدوين

كم أشتقت إلى التدوين
مر عام ونصف على آخر تدوينة
ويالهـا من فترة مليئــة بالأحــــداث الهامــة
وكــم الـــدروس التـــي تعلمتهــا مـــن الحيـــاة فــي هــذه الفترة
وكم تغيّرت شخصيتي في هذه الفترة من واقع الخبرات والأحداث والمواقف
وأحمد الله أني مازلت شروق الشمس ولم أتبدل لأكون إنسانة أخرى
ولأن ما تعلمته كثيرًا.. أردتُ العودة مجددًا إلى مدونتي الحبيبة
والتي اعتذر لها على طول غيابي لتزاحم اهتماماتي خلال الفترة السابقة
فلتقبلي اعتذاري يا مدونتي الغالية

السلام عليكم ورحمة الله وبركاته..


بعد طوول غياب.. ومع تفشي الفساد


آن الميعاد.. لزيادة البوستات.....





مضى ثلاث شهور على آخر بوست حررته


وفي هذه الفترة حدث ولا حرج عن الأحداث والمصائب المترامية من كل مكان علينا نحن المسلمين العرب وعلى وجه الخصوص في مصرنا الغالية، الأسعار لم تعلو فقط بل استقلت طائرة وسافرت الفضاء والرشوة على أشدها وهي العرف السائد، ـ اعتقد الحكومة بتفكر تصمم مستند إستلام رشوة .. ولكننا لا نيأس بالرغم من هذا السواد لا نيأس ولن نيأس، فكرة التنويم المغناطيسي التي تتبناها الحكومة لن تظل طويلاً فالكثير من العامة فهم هذه اللعبة، وبدأ يفهم ماذا يجري حوله عندما ضاقت عليه السماء بما رحبت، إني أتساءل إلى أين تذهب الأموال الطائلة التي تحصل عليها مصر من قناة السويس والسياحة التي تتوافر في غالبية محافظات مصر، والكثير والكثير من اقتصاد الوطن الذي يحسدنا عليه الكثير ـ سؤال برئ جدًا وساذج ـ وبالرغم من هذه الموارد التي لا أحد يعلم أين تذهب إلا الله ومن يكتنزها إلا أن المستشفيات المصرية في بلاء تام والمدارس يحكي حالها الطلبة المغلوبين على أمرهم الذي ينهون المرحلة الابتدائية ولا يعرفون الفرق بين حرف الألف ورقم واحد، ثم بعد ذلك تتحدث حكومتنا الرشيدة على التخطيط القويم للمستقبل والانجازات في عهد سيادته، افتتحت سيادتها مكتبة الاسكندرية، ما قيمة الكتاب في يد من لا يقرأه؟؟ وما قيمة المال في يد مجنون؟؟ وما يفعله فخامته الآن بناء صرح ليُكتب عليه شُيّد في عصر سيادته، ويُعد له من إنجازاته..





أرى أن مصطلح كوسة لم يعد يتحمل المزيد فنحن تفوقنا عليه بكثير في الماضي القريب تطلق الكوسة على المسئول الصغير نسبيًا الذي يصنع الكوسة بمهارة دون علم المسئول الأعلى أو أحد من زملائه ولكن الآن يتفق المسئول مع الموظف وأيضًا المصلحة بصنع برميلاً ضخمًا من الكوسة في بداية السنة الحكومية وتوزيعها على المواطنين بالتساوي والعدل خلال أيام السنة، ولكن هنا وللأسف كانت الكوسة تقيلة نوعًا ما لزيادة التقلية مما أحدث ذلك حموضة للمواطنين وأعتقد أن بعض المواطنين يتداولون فيما بينهم لمطالبة الحكومة لتقليل التقلية حبيتن محاولة منهم للقضاء على الخسائر الناجمة من الحموضة في الأرواح والأموال.. وإديها كمان تقلية


وعادت الأمتحانات والله المستعان
وقبل الامتحانات كان عندي ضغط شغل..سبحان الله
كل سنة يحصل كدة وقت الامتحانات بالأخص ألاقي أكوام من المهام
يعني من غيابي عن التدوين بسبب العمل إلى غيابي بسبب الامتحانات
لعله خير إن شاء الله..
المهم إن الغالبية أعتقد إنهم مشغولين في الفترة دي زيي
وبالرغم من كدة هسيب كام سؤال على الماشي بمناسبة الامتحانات
وأكيد مش كل الناس بتمتحن في الوقت ده في مدونين كتييييير خلصوا دراسة
عشان كدة عاوزين نعرف ذكريات الناس عن الامتحانات والمواقف اللي مش هتتنسي
من خلال الكام سؤال دووووول
أول أمتحان في حياتك وحسيت إنه أمتحان صعب فعلا؟
أكتر مرة خوفت فيها من أمتحان.. وكان إيه السبب؟
أطرف موقف حصلك في الامتحان؟
أتأخرت مرة في حضور امتحان.. طب عملت إيه؟
كفاية كدة.. وأراكم ناجحين إن شاء الله

ما أكثر المصائب التي تأتي في هذه الأيام.. بوجه عام وليس شخصي
فكثرت المصائب حتى بلغت الحلقوم.. حتى أنني كلما فكرت في التدوين
تتناثر مصائب وأشلاء كوارث حتى أقول.. عن ماذا أكتب كلها مصائب
وكلنا في بوتقة واحدة ننتظر الخلاص.. ولكنه يأتي بأيدينا معًا.. وإنا لناظره قريب
وهذه المصائب لا تمسني بشكل شخصي ولكني أشعر وكأنني صاحبتها
صارت أنا وهي كالجسد الواحد يتداعي ويأن ويصرخ من الألم
وكلنا في هذا الألم ولكن لعل البعض منا ينساه أحيانًا أو يتنساه مع أننا تحت حصاره
ألا وهو الظلم الذي يحيط بنا في كل جنبات الحياة.. هكذا الدنيا ننتظر في ظلها ساعة
وما أقساها من ساعة.. اللهم أخرجنا منها على خير
الحمد لله


السلام عليكم ورحمة الله وبركاته..،


ياااه بقالي فترة كبيرة جدًا مدونتش


رمضان بقى والعيد وكل سنة وأنتم إلى الله أقرب


جالي تاج من الفجر قادم.. وده أول تاج في حياتي التدوينية


وزي ماقالت فجر إن التاج يعني كأنها بتقولي "مسكتك".. ماشي ياستي


حلوة حكاية الاستغماية دي.. ربنا يستر بقى


ونبدأ اللعب


لو قالولك اختاري عصر من عصور مصرعلشان تعيشي فيه تختار اى عصر و فى عهد اى ...واشمعنى؟

عصر.. عصر.. عصر.. كان نفسي أعيش في عصر زهوة الأندلس

لأن كانت الأندلس منارة للعلم والتقدم والازدهار وكانت أزهى وقت للمسلمين

ووصلو في الوقت ده لتقدم بالغ في مجالات كتير لو كنت في العصر ده كان يبقى نفسي أكون طبيبة


اول اولويه فى حياتك عيلتك ولا شغلك ولا اصحابك؟

بصراحة حياتي أول حاجة، وحياتي عمرها ما اعترضت عائلتي في حاجة
بل على العكس بفضل الله كل قرار يخص حياتي عائلتي بتكون راضية عنه الحمد لله
أما الشغل والأصحاب مقدرش أحط حاجة قبل حاجة بس بخاف على مصلحة الشغل
وبرتب الدنيا مع أصحابي


ايه اكتر حاجه بتحبيها فى رمضان؟

صلاة التهجد.. والاحساس بالناس اللي جت من كل مكان عشان تصلي وتبكي بين يدي الله ووجوهم البشوشة الفرحانة بالطاعات وخشوعهم واضح في عيونهم وكلامهم وصمتهم... إحساس جميل


اوصفى ليا اجمل فطار ممكن تفطريه؟

أجمل فطار مع أهلي أول يوم في رمضان وكلنا مع بعض ومحدش غايب وإحنا فرحانين بلمتنا وبرمضان وعمالين نهزر مع بعض ونضحك ومش مشكلة ناكل إيه بعد كدة


لو انت حاكم على مجموعه من الافراد هتكون ...هتعمل ايه عشان تتأكد انك حاكم عادل؟

هروح لأقل واحد وأفقر واحد من المجموعة وهسأله لو كنت حاكم مكاني هتعمل إيه؟.. وهشوف هل اللي نفسه يعمله الفقير ده أ،ا حققته ولا لأ.. ولأن أفقر واحد مش هيخاف على حاجة تضيع منه ومش هيخاف من منصبي فيهقول الصراحة وهيحلم بجد انه بقى حاكم


اللى بيبوظ الحكام .......نفسهم؟ ولا الشعب؟ ولا الحاشيه المقربه؟

ميكس بين الثلاتة.. يعني الحكام نفسهم لانهم مقدروش الأمانة اللي بين إيديهم.. يعني مثلا عمر بن الخطاب رضي الله عنه كان بينزل بالليل يتفقد حال الرعية هل الشعب طلب من كده؟؟ لا طبعًا ده من نفسه..


والشعب كمان.. ليه؟؟ لأن الرئيس من الشعب يعني هو منا ومن أعمالنا سُلط علينا..

الحاشية ..ربنا ياخد المنافقين منهم، لأنهم أصلا مرتزقة ولهم مصالح وبينتفعوا من الفساد وكله بيعبي في حسابه ومن زمان ودايمًا يطلعوا العيب على الحاشية طب فين مخ الرئيس معتوه مثلاً هو أه أمرهم شورى بينهم لكن الحاكم له أنه يزن الأمور بميزان الحكمة


مين أكتر اعلامي مصري بتحترميه؟

أحمد منصور


قريتي ديوان عمر مصطفى صاحب بلوج تجربه " اسباب وجيهه للفرح" عن دار ملامح و لا لسه ؟؟ لو اه ايه رايك فيه؟؟

لا للاسف لم أقرأه.. لكن إن شاء الله هقرأه


ممكن تشتغل شغلانه تانيه غير اللى انت بتشتغلها او كنت بتشتغلها كنت تتمنى تبقى ايه؟

هو دلوقتي أنا بدرس وبشتغل وإن شاء الله هغير عملي بعد ما أخلص دراسة

نفسي أكون أعلامية أو بقدم مشروع تربوي ضخم للأطفال يستهدف تنمية عقول الأطفال والارتقاء بمستوى ذكائهم


ايه تانى بلد تتمنى تعيش فيها بعد مصر؟

ماليزيا


اوصفي ليا ترتيبات اجمل فرح ممكن تحضرية؟

يكون فرح إسلامي.. وتدخل العروسة لحد القاعة ومفيش حاجة باينة منها ومعها زوجها والأخوات يستقبلوها وهما عاملين صفين والعروسة تعدي ما بينهم ويخرج العريس ويبدأ الفرح بالإنشاد وتكون القاعة كبيرة أوووي والأخوات كتييييييييييييييييييييييييييييييييييييييييييير ومنظمين..


بتراعي كلام الناس والقيل والقال؟ لو اه او لا قولى ليه؟

كنت الأول براعي كلام الناس لكني تعبت نفسيًا.. ولقيت إني طالما برضي أبي وأمي ومش بعمل ما يسوء لي ولإسلامي خلاص إن شاااااااء الله يــــ... ولا خلاص الطيب أحسن

وبمناسبة السؤال ده افتكرت أنشودة بتقول

ضحكت فقالوا ألا تحتشم.. بكيت فقالوا ألا تبتسم

صمتُ فقالوا كليل اللسان.. نطقتُ فقالوا كثيرُ الكلم

حلمتُ فقالوا صنيع جبان ولو كان مجترئً لانتقم

فأدركت إنيَ مهما أردت رضا الناسٍ لابد من أن أذم


صحيت من النوم ما لقيتش الموبايل ولا الكمبيوتر ولا الكاميرا الديجيتال ولقيتنا رجعنا لعصر الحمام الزاجل والحصنه هتكون سعيد؟

مممم.. ساعات بتمنى النور يقطع لساعات وتنقطع معها كل التكنولوجيا بس للساعات عشان أرتاح شوية من كم الإزعاج اللي حواليا زن التلاجة والكمبيوتر وصوت التليفزيون والراديو ورنات الموبيايل والتكييف وجرس الباب والتليفون .. بس مقدرش أعيش من غير كل ده لأني اتعودت على كل ده.. يعني مثلاأفتكر من عشر سنين كدة مكنش في موبايل بفضل أقول ياترى الشركات كانت بتعمل إيه لو موظف مهم أتأخر على الشغل أو غاب هو أه هيخصمو له لكن الشغل اللي بيقف في الفترة دي.. مش عارفة


السعاده بالنسبه لك هى؟

الثقة بالله وراحة البال والرضا .. وصفاء النفس


عندك امل ...اسبابك؟

طبعاااااااااااااااااااااااااااااا.. لأن وعد ربنا حق وأنا عندي ثقة بالله شوفوا ثقة سيدنا موسى لما كان البحر قدامه وفرعون وملائه خلفه أي شخص عادي هيظن الهلاك مش هيفكر في أنه يقول كما قال نبي الله موسى (كلا إن معيّ ربي سيهدين ) تمام الثقة بالله.. فكلا إن معي ربي سيهدين.. والهداية هتكون لنفسي ومجتمعي وأمتي إن شاء الله


لما تحب تهرب من كل شئ بتروح فين؟

أقعد لوحدي في بيتنا وأكتب خواطري عن لحظة الهروب دي..


امتى أول مره خدت فيها نفس طويل كده وقلت بينك وبين نفسك يااااه الظاهر انا فعلا كبرت؟

لما أشتغلت في الشركة وحضرت أول أجتماع وكان المفروض أقول رأيي في قرار مهم للشركة وكنا بنتاقش في القرار ده


لما بتعمل عمل خيرى بيكون ايه هو دافعك الاول؟

ياااه دوافع كتييير..

- أول حاجة عمل يحبه الله ورسوله.. يبقى ليه ما أعملهوش

- تاني حاجة عمل يفيد مجتمعي وأمتى.

- تالت حاجة الدافع النفسي إني أكون شخص أيجابي

- رابع حاجة أنا بكون سعيدة جدًا وأنا بعمل عمل خيري


بتعرف ايدك اليمين من الشمال ازاي؟

إيدي اليمين لابسة فيها خاتم والشمال لا.. هههههه.. وساعات بخلع الخاتم مبعرفش الاتنين من بعض

ده سؤال ده


ايه اكتر اله موسيقيه بتحبها ؟

الأكسلفون.. لأنها آلة رقيقة جدًا وزمان أوي لما كنت في إعدادي كنت بعزف عليها لكن دلوقتي لاا


فى رأيك ليه الذوق والنخوه اتعدموا؟

لأن ده التطور الطبيعي للفساد.. مش للحاجة الصاقعة

عشان مؤسسات الدولة أتخلت عن مسئولياتها الحقيقة وبقى الفساد مسيطر

فطبيعي هيكون الناتج إيه غير عدم شعور بالمسئولية ولا مبالاة

الأمر عبارة عن عقد إن إنفرط حبة من حبات الأخلاق ذهبت وراءها الأخلاق تباعًا

وحل محلها مالا يحمد عقباه..


ايه الحاجه اللى لو حصلتلك تبقى سعيد قوى؟؟؟

أزور المسجد الحرام والمسجد النبوي والمسجد الأقصى "وهو محرر"

وفي حاجات تانية بسيطة لكن مبقتش أتخليل إنها ممكن تسعدني لكنها ممكن تحزني

زي نجاحي مثلا لو نجحت هفرح بس عادي مش أوي يعني لكن لو العكس الله لا يقدر أكيد هكون حزينة


تختار يبقى عندك...ارض زراعيه ولا اجنس عربيات و لا كام عماره و لا فلوس فى البنك؟؟؟؟

لو أرض زراعية ياريت تكون في الريف الأوربي عشان بحب المكان ده أوي

لو أجنس عربيات يبقى ياريت تكون عربيات سكودا لأن مش عارفة إيه سر حبي في النوع العبيط ده من العربيات

لو كام عمارة ياريت يكونوا جنب بعض عشان أعملهم مدرسة إسلامية بجد خاصة لو فلوس في البنك ياريت يكونوا في بنك فيصل الإسلامي عشان يعمل بيهم مشروعات تفيد البلد ومتكونش حرام


البحر و لا النيل؟؟

البحر بلا منازع..


مركب ولا طياره؟

مركب وأشوف الأسماك وهي بتتنطط جنبي والدولفين يضرب شقلباظ في الهوا وهو بيضحك.. يبقى مركب

لكن لو طيارة وهتوصل بسرعة للحجاز عشان أعمل عمرة وبعد كدة هتاخدني جررررى على الأقصى.. يبقى طيارة طبعًا..


انت مجنونه ولا عاقله؟

الاتنين مع بعض مفيش حد عاقل بس أو مجنون بس كل شخص جواه الاتنين


تقرأ كتاب و لا تتفرج عليه فيلم؟

لو أي فيلم عادي يبقى كتاب.. لو أفلام تسجيلية علمية يبقى الفيلم


بتمرر التاج لمين؟

أخيرًا وصلت للسؤال ده.. ياااااه فينك من زمان

بمرره لـ (إخوانية مصرية .. زي الشمس .. الفجرية) يااالا بالشفا إن شاء الله


سبحان الله...،


ما بال الناس يذهبون ولا يرجعون
أرضوا فأقاموا.. أم تُركوا فناوموا؟؟

والله إن في السماء لخبره..وإن في الأرض لعبرة
ده جزء من إلقاء لقس بن ساعدة الأيادي أيام الجاهلية..
كان بيستغرب حال الناس اللي بتموت مش بترجع تاني وده قبل الإسلام
ودلوقتي وإحنا في الإسلام الناس لا تعتبر من قلة بركة الوقت
فاكرين أول يوم رمضان؟؟
وإحنا بنهني بعض بقدومه وبنسأل هنصلي وخطتنا إيه في رمضان
أيام بترووح ومحدش بيحس بيها.. وأهو الكل بيقول الوقت مفهوش بركة
أكيد من ذنوبنا.. فاكرين من عشرين يووم يااااااه هو فات عشرين يوم
أه والله فات عشرين يوم شوف سبحان الله.. إحنا لسه ملحقناش نهني بعض بدخول الشهر
أنا لسه كل ما أشوف حد بقوله كل سنة وأنت إلى الله أقرب
خلاص الشهر خلص كدة بسرعة..
لا لسه لسه متستعجلش في عشرة أيام من أهم عشر في الشهر
العشر الأواخر
هتغتنمهم ولا لسه الدنيا ضايعة عندك؟؟؟
يا من ضاع منه الأيام ولم يشعر بها
أري الله من نفسك خيرا فيما بقى من أيام
لا تبكي على مافاتك فما فاتك قد فاتك
وأنظر إلى العشر وهلم إلى الطاعات
لعل الله يجعل لك فيهم خيرا كثيرا
أوصيكم ونفسي .. اللي أجتهد في أول رمضان يظل على اجتهاده بل يزيد
ومن قصر فليغتنم آخر عشر من أيام الخير.. ويلغترف بجميع جوارحه مااستطاع...
ياجماعة رمضان لو خلص هيجي بعد سنة.. سنــــــــــــــــة
مين يعيش؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟؟
لو ضامن تعيش سنة كام خلاص سيبك من العشر الأواخر وخليك في الكحك والبسكويت وهدوم العيد
ياااالا سلام وفي حفظ الله
وبالله عليكم بالله عليكم بالله عليكم
متنسونيش من صالح دعائكم
ربنا يبارك لكم
ودعوة قليلة تمنع بلاوي كتير
وهنيالك ياداعي بالخير والثواب
ربنا يكرمك
وكل عام وأنتم إلى الله أقرب
وربنا يبلغنا جميعًا ليلة القدر ويغفر لنا ما تقدم من ذنبنا وما تأخر
والبوست الجي أعتقد هيكون بعد العيد
كل سنة وأنتم طيبين







آآآآآآآآآآآآآآآآه ياااااابطني

مش قاااااادر أصلىىىىىىىى

بدوووخ في الصلاة وبيحصلي هبووووط حاااد

أصل أنا مش بروح أصلي عشان من عشر سنين كدة جالي إغماء!!

ـــــــــــــــــــــــــــ


عبارات كتييير بنسمعها في رمضان للتملص من صلاة التراويح

وعادة العبارات دي بنسمعها كتيييير أوووووي بعد أول أسبوع من الشهر الكريم

وده لأن المسلسلات بتبدي تسخن وتحلوووو.. والناس مش بتقدر لأن السيد شوشو

كان مزود جرعته عليهم قبل رمضان، فعندهم مخزون لحد آخر الشهر ويكفي لشهر بعده

وما أن نستهل رمضان بنفحاته الربانية إلا ويبدأ التليفزيون في الإعلان عن المسلسلات والبرامج

الهاااايفة بحجة شغل الصايم أثناء وتهوين الصيام عليه بالهايفة والمسخرة

وللأسف مع مرور أول أيام من رمضان بيقل الحافز الروحاني عند أىىىى إنسان

بيتفرج على التليفزيون في رمضان.. وأراااااهن أي حد بيتفرج على التليفزيون وبيعرف يكمل

رمضان زي ما أبتداه.. استحاااااااااااااالة

عشان كدة ياجماعة المفروض نضغط على نفسنا شوية

وننسى إن في تليفزيون اصلا.. إلا لو مثلا برامج إسلامية

على قنوات إسلامية كاملة مش بتبث أي مسلسلات عشان عيونا متزوووغش عندها

وأفضل في رمضاننا هذا قناة العفاسي ـ ورسالة ـ والمجد ـ والناس

أن لا نحووووول عنهم أو ننظر لغيرهم إلا لمثلهم... هاااااااااااااا

وإن شاء الله رمضاننا ده هيكون أحسن عبادة من أي رمضان تاني...

دي أول حاجة.. ندخل في الموضوع اللي بعده

إلا وهي الأكلللللللللللللللللللللللللللل


مدفع الإفطاااااااااااااااااااااااااااار

أضررررررررررررررررررررررررررب


بووووووووووووووووووووووووووووووووووووووووووم


تك بوم تش صه سك تك تك تك سسس سسس غغغمممم غممممم

بووى بوووى بووووا بووووا بوووووواااااا

الكل طبعًا مستغرب السطرين اللي فوق دول..

دول بعيد عنكم صووووت الأكل وهو ناااازل وكأنه نازل مزلقان

بس مزلقان مزحلق شوووووية.. والسطر التاني ده صوت المية والعصير

المهم أتكبست كبسة حلوة أووووووي ومبقاش في نفس

زي الحااااج اللي في الصوووورة دي










تفتكروا الراجل ده ممكن يروح يصلي بعد المصيبة اللي عملها دي


حتى لو راح الصلاة..... هيكمل التراويح للآخر؟؟؟؟؟؟


أكيد نوووو... وياااترى هو ده الصيااااام؟؟؟


عشان كدة مش لازم نخرج من رمضان وإحنا حاااااملين الدسم


ولكن تكون حصيلتنا في آخر رمضان عبادات جديدة ثبتنا عليها


وطاعات تقربنا بها لربنا.. وتركنا معصية وأكتسبنا طاعة



فأدعوووكم لفكرة جميلة إن شاء الله أقدر أعملها وأنتم كمان وهي...






تيجوووو كلنا نصوم رمضان السنة دي..

جديدة مش كدة



كل عاااام وأنتم إلى الله أقرب

وتقبل الله منا ومنكم صااالح الأعمال

وغفر الله لنا ولكم

كلت الأيادي من الحروف ولم تنقطع من المعاني

وملت الألسنة من الكلام ولم تنقطع عن السؤال

وتعبت العيون من السهر ولم ينقطع لها بكاء

وباتت القلوب جريحة في ظلمات الليل البهيم

ونامت في أحضانها الآلام وسكنها الأوجاع

ونام من حولي فما من مغيث.....

أحقًا لا من مغيث!!!!

أحقًا لا من مغيث!!!!

حقًا لا من مغيث... إلاه

وربي لا من مغيث إلا ربي

ربي.. تداعى علي الجبارين.. فاجبر كسري

ربي.. آلمتني الدنيا وأكسبتني الهم والحزن.. فأجلو همي وأرح قلبي

ربي لا يعلم ما في خفيتي إلاك.. فأصلح ذات بيني

إلهي.. تجف الكلمات وما يجف الرجاء

فأجرني من عذاب النار


النور عشان يظهر في حياتنا


لازم نشوف قبله الضلمــــة

ـــــ

والشمس بتيجي بعد الليل الطويل


وبتغرب بعد نهار طويل

ـــ

دايرة وكلنا بنعيش فيها


طفل صغير عاجز عن المشي


لـشيخ كبير وعاجز بردوا عن المشي

ـــ

وبردوا التدوين، من أفكار كتير


بتنقي منها اللي على مزاجك


إلى جفاء فكري تدويني بحت

ــــــ

حسيت إن كتير بيعانوا من الحالة دي دلوقت


لكن اللي عاوزة أقوله مش لازم أكون مرتبة حاجة معينة


أنت بتدووون من أجل هدف معين، ولو تعثر هذا الهدف في فترة ما


فدون من أجل التدوين.. عشان متحسش في لحظة أنك مش قادر تكمل


وأن اللي ابتديته مكنش ليه لزمة من الأول..


أنا مش قادر أدون.. دوّن وقول ليه مش قادر تتدون


وهتلاقي نفسك بتدون أحسن تدوين


ــــ

ـــــإلى التدوين بقى...ـــــ


حبة فزلكة


تخيلت لقدام شوية بعد 30 سنة كدة لو كنت عايشة ومدونتي لسه شغالة

إن مزاجي التدويني في الأرض وفضلت المشكلة دي معايا كتير ياترى هشتكي وأقول إيه

أروح للدكتور وأقوله (دكتور عندي اكتئاب ومش عارفة أدون خالص مالص..يقولي حللي دم،

ويبص في التحاليل ويقولي.. الحالة متطمنش أنتي عندك ((فقر تدوين)).. العلاج

أكتبي كل يوم تلات سطور من موضوع في المدونة وأمسحيهم بعدها

مرتين في اليوم قبل الدخول ع النت وبعده.. وعلى إسرى هذه المشكلة

التي بالطبع هيعاني منها الكثير من المدونين المعتئين اللي هيبقوا زيي

هتكتر العيادات والبطالة الطبية هتقل كتييير.. وبعدين الخدمة هتتحسن

عشان الدكاترة هيخافوا من المدونين لو كتبوا عنهم وفضحهوهم..

ومش بعيد يعملوا مكان مخصص في الأتوبيس للمدونين

(ممنوع الجلوس.. خاص بالمدونين) أوعى حد يقربلهم

ــــــــــــــــــــــــــ

فزلكة تانية

كنت زمان بفكر في فكرة إبداعية بجد الكلام ده من 6سنين تقريبا

لو مثلا أقدر إني أشم ريحة البرفان من النت والفكرة جت لي من

برموشن كنت لما بمسح على صورة أزازة البرفان ريحته بتطلع

في إيدي فجت لي فكرة ليه مينفعش إني أختار البرفان اللي عاوزاه

من الشركات العالمية وأشمه وأجربه ـ بس مش هشتريه ـ ومن سنة

عرفت إنهم عملوا حاجة زي دي جهاز معين بيتركب بيعمل كدة

فكرت في اختراع جديد، عشان التدوينة دي تكون شاهدة عليا ومسجلة

اختراعاتي وفزلكاتي.. لو مثلا يعملوا برفان ـ خليه للأطفال عشان أتكلم براحتي ـ

ولو الطفل حط البرفان ومامته لفت حواليه بشكل دائري تشم ريحة معينة

ولو لفت حواليه بشكل مثلث مثلا تشم ريحة تانية ولو لفت بشكل مربع تتغير ريحته

وهكذا.. مع إنه هو هو نفس البرفان.. فكرة مطرقعة

يااااه.. بقالي كتير مدونتش..
كان عندي ضغط كتييييييييييير
ودلوقتي رميت جزء من الضغط نسبيًا
وهوووب سافرت على اسكندرية.....وبدأت
وبدأت الأفكار التدوينية تنهال عليا من أول ما ركبت
الميكروباص من القاهرة وإلى الإسكندرية.. حاجات كتيييير
لفتت نظري إن المصرين أكتر ناس تعمل حوارات ..
تلاقي مثلا الفكهاني كاتب على التفاح 2 جنيه تقرب شوية تلاقيه بـ 2.99
تركب الميكروباص وبعد ما تختار مكان وترتاح فيه وحبذا لو جنب الشباك
وتفضل منتظر الميكروباص يتملي وبعد مايتملي تلاقي السواء يقولك
الأجرة بـجنيه يا أفندية في حين إنها .75قرش مثلا!!
تقرأ في أي قسم شرطة (الشرطة في خدمة الشعب) المفروض بدون مقابل..
لكن الحقيقة غير كدة خااالص المتهم والمجني عليه بيدفعوا ويرشوا
بالجاامد عشان الموضوع يتمرر ويظبطوا القضية على مزاجهم!!
في التليفزيون يقولوا الكادر الكادر الكادر وكل مدرس هيحقق اللي نفسه
فيه شقة وعربية ووو...وبعد ماالمدرسين يفرقوا شربات على الكادر
تلاقي الدخل الزيادة أدفع في حاجات تانية ومن ضمنهم الشربات اللي فرقوه
لأن الحكومة غلت سعره لما زاد الطلب عليه...
تقرأ القانون تلاقيه بيقول إرهاب وفي الحقيقة ممكن تلاقي جدك سحبينه
على المعتقل في حين إنه ميعرفش يعني إيه إرهاب!!!
هي ليه كل الناس بتستغل بعض بالشكل ده
الناس بتشتكي بعضيها ليه؟؟؟؟؟؟؟؟؟
تلاقي واحد بيلعن شخص أستغله وهو نفسه بيستغل الناس
هو إحنا هنفضل كدة كتير؟؟؟
كل اللي فات ده بيحسس أي حد إن مفيش ثقة
مفيش أمان
مفيش خير
مفيش طيبة
تفتكروا القلة المعترضة تقدر تغير حاجة؟؟؟
المفروض الواحد كان يتكلم عن البحر وجمال البحروسحر البحر.. لكن المتعوس متعوس

في أروووبا والدول المتقدمة.. هي دي الميكروباصات ولا بلاش



هو بيقود بهايم ولا إيه..
ومفيش حد قادر عليه..
يا عمي داحنا البني آدمين
ولا أنت مش فاهم بتقود مين
أو حتى مش محسوب ف العقلين
صحصح كدة وفتح مخك
بس أوعاك تفتحلي ف بقك
ولا إحنا بنكلم معتوهين
براحة داحنا ف عربيتك
والدريكسيون داب في إيدك
عجلك شمال كتير على حبة يمين
رايحين على فين مش عارفين
ياعم دغدت مفاصلنا
ومعاك قصرت أعمارنا
أظبط شكمانك يامعلم
ولا فيش معاك حد هيتكلم
أو حد يصرخ ويتألم
زيتك ياحاج رحته فاحت
والصحة معاه أهي راحت
وم الكحة الحنجرة باظت
الكل بيصرخ في ودانك
ياعم ظبط شكمانك
لا عمرك يوم بتسمعنا
أو حتى اتهزيت في مكانك
يا عمي اسمعنا مرة
دي عيشتك بقت صعبة ومرة
دا الطب يابا بيتقدم
ومبنقاش بنمشي بالخرزانة
أهدى كدة وتريس
دانت الأسطى فيها والريس
من جريك روحنا بتفيص
ولا أنت مش راكب ويانا
والله شكلك ما معانا...
وجيت تاخدنا على قفانا..
وخلاص معدنا نتحمل
توصليتك دي الخربانة..
ونصحية مني أمانة..
حوووود على أقرب جبانة..

مذكرات راكبة في الميكروباص
كتبتها فعلا في مكروباص كان مبهدلنا
لحسن حد يفهم كلام غلللللللللللللللللللللللللط

طايرة
سعيدة
مبسوطة
فرحاااااااااانة جدًا

كل دي كلمات وفي أكتر منها بتوصف اللي جوايا من فرحة
وده لأني الحمدلله أخيرًااااااااااااااااااااااا نجححححححححححححححححت
هتقولوا وإيه يعني ما كل الناس بتنجح ومش لازم بوست يعني عشان النجااح.. لا إلا أناااااااااا
أنا لي وضع خااااص.. ـ كل الناس خيبتهم السبت والحد وأنا خبتي الأسبوع كله ـ وده لأني انتكست في الدراسة
مش مرة لا مرتين في نفس السنة الكبيسة دي.. أنا مش مكسوفة من إني أقول كده لأني في الفترة دي أثبت نجاحي في حاجات تانية
وخصوصًا إن الدراسة بالنسبة لي أولوية ثانية وليست أولى بس دلوقتي أتحولت أولى عشان أخلص بقى من الدراسة دي
أنا مش بليدة الحمد لله والدليل على كدة إني عملت معادلة وذاكرت في خلال عشر أيام مواد المعادلة وامتحنت
وجبت مجموع كويس ودخلت تجارة انتظام الحمدلله.. وبردوا ناجحة في عملي وفي حاجات تانية
بس الحمد لله دلوقتي بقى كله ياااارب السنة الجاية أجيب امتيااااز.. أنا فرحانة جدًا
حاسة إني كنت مقيدة واتحررت كنت مخنوقة وتنفست الصعداء
يارب كل اللي نفسه في حاجة يحققها
وبدعي لأخواتي وإخواني في الله
طاهرة ربنا يرزقك ما تتمنيه
نورا ربنا يرزقك ما تتمنيه
محمد ربنا يرزقك ما تتمناه
هناء ربنا يوفقك ويقدر لكي الخير
علا ربنا يفك كربك
هالة ربنا يرزقك من حيث لا تحتسبي
ريهام وهشام ربنا ينجحكم ياااارب
وربنا يجعل تحرير المسجد الأقصى على أيدينا
الحمد لله الحمد لله الحمد لله

نجاح أحمد شعبان أظهر ردود فعل متباينة بين مستغرب ومتحفظ خاصةً بعد الأنباء المؤكدة بأن فوز مرشح حزب التجمع، إنما جاء عبر صفقةٍ بين رفعت السعيد- رئيس حزب التجمع- وقيادات الحزب الوطني بعد قرار أحزاب المعارضة الرئيسية الوفد والناصري بالمقاطعة ورفض المشاركة في حين فضل حزب التجمع أن يجامل النظام بمرشحين اثنين كان أحمد شعبان واحد منهم بل والوحيد الذي قبلت أوراق ترشيحه قبل يوم واحد من بدء عملية التصويت من بين عشرات الأحكام القضائية لقبول مرشحين آخرين بإدراج أسمائهم ضمن كشوف المرشحين لتلك الانتخابات إلى جانب أحكام قضائية تقضي بوقف تنفيذ وإلغاء قرار إجراء انتخابات الشورى بالدائرة الرابعة بمحافظة الإسكندرية ومقرها أقسام (اللبان- الجمرك- مينا البصل)ــــ المصدر إخوان أون لاين ــــ
أدان الرئيس المصري حسني مبارك اليوم السبت سيطرة حركة المقاومة الاسلامية (حماس) على غزة وقال إنه يعد "انقلابا على الشرعية الفلسطينية"..
وقال مبارك موجها حديثه لبرلمانيين من حزبه الوطني الديمقراطي الحاكم "نتابع عن قرب تداعيات الانقلاب على الشرعية الفلسطينية (في غزة) وما ألحقه من أضرار جسيمة بالشعب الفلسطيني."
وتابع "نأسى لاراقة الدماء الفلسطينية بأيدي الفلسطينيين في اقتتال تجاوز كل الخطوط الحمراء."
وتستعد مصر لاستضافة قمة إقليمية تضم رئيس السلطة الوطنية الفلسطينية محمود عباس والعاهل الأردني عبدالله الثاني ورئيس الوزراء الاسرائيلي إيهود أولمرت بعد يومين في منتجع شرم الشيخ على البحر الأحمر.
وأدانت مصر بالفعل حماس بعد تغلبها على حركة فتح التي يتزعمها الرئيس الفلسطيني محمود عباس في قطاع غزة وحثت كل الفلسطينيين على الالتفاف حول عباس..
وقررت مصر الاسبوع الماضي نقل سفيرها ودبلوماسييها لدى السلطة الفلسطينية من غزة الى الضفة الغربيةــــالمصدر الـ بي بي سي ــــ
هل يوجد فرق بين الكلام بالأحمر ده وبين الأحمر بخطاب رفعت السعيد "حزب التجمع"؟؟؟ أنا لا أرى فرقًا، ومن الطبيعي عدم التفوه بكلام عكس السيد الرئيس فهذا يُعد قبحًا وبالأخص بعدما تمت الصفقة على خير!! فهذا الخطاب بمثابة هدية للرئيس بعد اتمام الثفقة، وأهو كل من هب ودب يتحدث باسم مصر،، ـ حسبنا الله ـ فلا تتوقعوا في هذا الزمن ومع هؤلاء أن يقول أحدًا منهم كلمة "حــــــق" فها نحن أعتادنا ذلك، ولا عزاء للشعوب "المقهورة"، فمن الطبيعي أن تجد حركة المقاومة الجادة الفعلية كل هذه الانتقادات والاتهامات، وأرى أن الخطأ الوحيد الذي ارتكبته حماس هو الدخول في حكومة تميع الحق "فتح"، ومازلت أهتف...
حماااااس حمــــــــــــــــــــــــــــــاس حمــــــــــــــــــاس

مازال النظام في مصر يتعامل مع شعبهُ بسياسية العبيد.. والفقراء يدخلون الجنة..
وتنجلي هذه السياسة واضحة في تعمد سيادته إذلال جميع فئات الشعب "وتنشيف ريقهم" لتحقيق أقل المطالب التي هي حق للجميع، وليس هذا فحسب فتتضح أيضًا هذه السياسة في وعود سيادته على حياة أفضل ودنيا وردي لا يراها ولا يعيشها إلا سيادته..


ونأخذ على سبيل المثال مشروع الكادر الذي تعلق عليه أحلام المعلمين بشراء الفيلا والشاليه في الساحل الشمالي، وهذا لأن سيادته عند ترشيحه في الانتخابات ـ قال ترشيح قال ـ عمل على تسمين وتضخيم حجم الفوائد التي سيحصل عليها الشعب ـ المغلوب على أمره ـ إذا قام بانتخاب الريس وفوزه في الانتخاب ـ ولا يجرؤ أحد أن يشك في عدم فوزه ـ وما أن تم فوزه بدأت المماطلة.. وبدأ الأخذ بقوة وسحب بعض المباحات التي نتمتع بها دون وجود رئيس ولا غفير، وبدى هذا الأخذ والسحب في غلاء الأسعار التي يصرخ منها الجميع مع ثبات المرتبات كما هي، وأيضًا غلاء المواصلات، وبيع بعض شركات القطاع العام، زيادة البطالة والفساد والرشوة والتزوير والوساطة مع زيادة أسعار "الكوسة"، تدهور في التعليم والصحة وخلل مميت في التحتية بأكملها والجميع يرى هذا ويشعر به..


وما سبق هو الجزء الأول من النظرية وهو السحب..

والآن... نتحدث عن الجزء الثاني المنح ببطئ أي بعدما يتم سحب بعض المباحات يُعاد إعطاءها ولكن.. بعدما يُذل المواطن المصري أولا.. "وتطلع عينيه" حتى بعدها أن سيادته هو المانح المُنعم الذي تفضل وأعطى وتصدق.. وسيادته لم ينام الليل وكانت عيونه "دبلانة" لأنه كان يفكر في إصلاح حال المواطن.. "بجد صعب عليا"..


ونرى هذا واضح.. فبعد بيع بعض شركات القطاع العام يعمل على إقامة مشروعات جديدة حتى تجد الحكومة ما تبيعه فيما بعد.. ولتحسين صورة الحكومة حيث أنها تبني وتعمر وتزرع و...و...و.. وأيضًا إمضاء سيادته على كادر المعلمين بعد ظهور أعراض المرارة على بعضها ومنهم من أجرى عملية لاستئصالها.. وذلك لكي يحظى سيادته على تأييد ومدح مختلف فئات الشعب ومنهم المعلمين الذين حظوا بعدم الابتلاء بالمرارة قبل إمضاء سيادته.. وغيرها الكثير من تلك المواقف التي تم التعامل معها بنفس السياسة الخائبة..


ومثلما تفعل مع البالونة..عندما تقوم بنفخها وكبتها بأكثر كم من الهواء ثم تركها.. تجدها طائرة في الهواء فرحًا ورقصًا.. وربما مدحًا.. فلا تكن كالبالونة.. بل قاوم واعترض..


عدتُ من جديد بسلام والحمد لله من غير إصابات
خلصت الامتحانات وكانت أيام كويسة ويارب ما تعوووووود
قصدي تتم وتنتهي على خير من دخول السرايا الصفرا أو الخضرة
ويارب بالنجاح لكل اللي بيمتحنوا واللي امتحنوا واللي لسه هيمتحنوا
ــــ ونبدأ بقى النشاط من جديد في المدونة اللي مكتبتش فيها حاجة
وأسألكم الدعاء

مدونتي النونو الصغنونووو
وحشاني موووت موووووت
نفسي أكتب فيكي كلااااام كتييير من فقاقيعي الجوااانية أووووي
ووووولكن!!
ما باليد حيلة،، تأتي الرياحو بما لا تشتهي السفنو
جاء الزائر السنوي هادم اللذات ومفرق الصحبة والشلااااااات
ألا وهو قرف الامتحااااااااااااااااااااااانات
جيت أذاكر مادة بايخة كدة أسمها قانون وأنا أصلا في تجارة
مش راضية تدخل الدماغ ابدأ بالطول بالعرض أبدااااا
قولت خلاص أذاكر الجزء التاني يمكن الجزء الأول
يغييير لما ارجع اذاكره يدخل الجزء التاني إنه يدخل أبداااااااااااا
وكأن الجزئين متحالفين عليا
المهم الواحد يفضل يذاكر ويتعب في قلبه عشان في الآخر
ندلق اللي ذاكرناه في ورقة الامتحان ودومتم
ياوجع القلب ـ مطحونين والله ياطلبة مصر
لي عودة بعد الامتحانات بس أدعووووولي كتييييير

بسم الله.. طؤ طؤ طؤ..
واحد اتنين تلاتة..المايك شغال..
كله تمام؟؟؟ كله تمام يااااالا نبتدىىىىى
كلاكيت هنسجل أول مرة.. وااااان.... تووووووو
ثررررررررري................أكششششششششششششن
سيادتي آنساتي سيادتي.. السلام عليكم ورحمة الله وبركاته..
نرحب بكم في هذه اللحظة وفي نفس الثانية والتوقيت وفي نفس البلد أيضًا ـ يامحاسن الصُدف ـ في مدونتنا النيووو جدًا جدًا فقاقيع كلام.. وبهذه المناسبة نتقدم لكم بخالص الشكر من عمو وأونكل وطنط شروق الشمس إلى الأهل والأصحاب في المدونات الجيران، وبنشكر كل الأنترنتجية اللي زارونا النهاردة في الافتتاح ـ وياالا بقى على مدوانتكم عشان مش هنوزع جاتوه ـ قصدي نورتنا خالص خالص ومنتظرين النقوط...

وبعد المقدمة والترحيب والذي منه.. نتكلم شوية عن فقاقيع كلام.. هتسألوني ليه فقاقيع كلام هجاوب بكل بساطة، لأن حتى الكلام بقى مفقوع من الكلام اللي بيتكلموه المتكلمين قصدي المسئولين أقصد صناع الفرار.. معلش مش مركزة قصدي صناع القرار.. صناع القرار في أي مكانٍ كان.. اللي بإيديهم يتحكموا في موظف بسيط ومنه لمصلحة ومنه لمجتمع وشعب ومن ثم التحكم في قرار أمة.. يعني من أصغر صانع للقرار نونو ولسه بيحبي تاا تاا تاا تاا خطي العتبة.. وحتىىىىى العملاق اللي بيتحكم في مصير أمة..

كلنا بإيدينا قرار بنصنعه حتى ولو ما اتعلمناش ده، الصمت على الذل ده قرار بالمشي جنب الحيط والعيش بمبدأ "وأنا مااالي وأنا ماااالي خليني ياعم أنا في حاااالي" هذا النوع من الصُناع بيديه يصنع ذل وهوان أمة، ولأن كتييير منا وللأسف يعيشون بهذا المبدأ اصبح الكلام في دنيانا هذه حرام..

وبردوا اللي أتكلم وقال للظلم لاااا في وشه.. واتبهدل ومخفش إلا الله وكان أهم حاجة عنده إنه يقول لاااا للفساد.. يقول للظالم أنا شايف ظلمك وهعلنه للناس.. النوع ده من الصناع عايش بمبدأ أن يحيي بيته أو مجتمعه أو أمته يصحيها من النوووم اللي عايشة فيه قومي بقى يا أمتى طلعتي روحي وفقعتي مرارتي والكلام منك اتفقع.. ولما اتفقع قال كلام.. والكلام ده جه هنا في فقاقيع كلام....

أي حد هنا مفقوع قرأ المدونة عشان مفقوع وعاوز يشارك في المدونة أرحب بكلامك المفقوع لو كان مفقوع زي كلامنا المفقوع، وهنتكلم عن أي حاجة فقعتنا أي حاجة أي حاجة..."وهو في إيه مبقاش يفقع"
فقاقيع بطير في الهوا..وفقاقيع مفقوعة من اللي افترافقاقيع روز..
فقاقيع وردي..وفقاقيع سودا في داهية تودي
وبالمناسبة دي تحبوا تقولوا إيه في الهبي نيو بلوجر؟؟؟حسبنا الله ونعم الوكييييييييييييييييييييييل





أنا مين؟؟؟

صورتي
Egypt
مصرية مسلمة وأخت في الله .. أعمل بإدارة الموارد البشرية.. وبحب السما والبحر والنجوم والشجر والأطفال والألوان والفجر والغروب والشعر والقراءة والتأمل.. وبحب ماليزيا وأنا من مصر ونفسي أموت في مكة وبحب اسكندرية وأنا من القاهرة ونفسي أزور القدس..

About this blog







Recent News

حكم يومية


ـــــ فقاقيع كلام ـــــ شروق الشمس