النور عشان يظهر في حياتنا
لازم نشوف قبله الضلمــــة
ـــــ
والشمس بتيجي بعد الليل الطويل
وبتغرب بعد نهار طويل
ـــ
دايرة وكلنا بنعيش فيها
طفل صغير عاجز عن المشي
لـشيخ كبير وعاجز بردوا عن المشي
ـــ
وبردوا التدوين، من أفكار كتير
بتنقي منها اللي على مزاجك
إلى جفاء فكري تدويني بحت
ــــــ
حسيت إن كتير بيعانوا من الحالة دي دلوقت
لكن اللي عاوزة أقوله مش لازم أكون مرتبة حاجة معينة
أنت بتدووون من أجل هدف معين، ولو تعثر هذا الهدف في فترة ما
فدون من أجل التدوين.. عشان متحسش في لحظة أنك مش قادر تكمل
وأن اللي ابتديته مكنش ليه لزمة من الأول..
أنا مش قادر أدون.. دوّن وقول ليه مش قادر تتدون
وهتلاقي نفسك بتدون أحسن تدوين
ــــ
ـــــإلى التدوين بقى...ـــــ
حبة فزلكة
تخيلت لقدام شوية بعد 30 سنة كدة لو كنت عايشة ومدونتي لسه شغالة
إن مزاجي التدويني في الأرض وفضلت المشكلة دي معايا كتير ياترى هشتكي وأقول إيه
أروح للدكتور وأقوله (دكتور عندي اكتئاب ومش عارفة أدون خالص مالص..يقولي حللي دم،
ويبص في التحاليل ويقولي.. الحالة متطمنش أنتي عندك ((فقر تدوين)).. العلاج
أكتبي كل يوم تلات سطور من موضوع في المدونة وأمسحيهم بعدها
مرتين في اليوم قبل الدخول ع النت وبعده.. وعلى إسرى هذه المشكلة
التي بالطبع هيعاني منها الكثير من المدونين المعتئين اللي هيبقوا زيي
هتكتر العيادات والبطالة الطبية هتقل كتييير.. وبعدين الخدمة هتتحسن
عشان الدكاترة هيخافوا من المدونين لو كتبوا عنهم وفضحهوهم..
ومش بعيد يعملوا مكان مخصص في الأتوبيس للمدونين
(ممنوع الجلوس.. خاص بالمدونين) أوعى حد يقربلهم
ــــــــــــــــــــــــــ
فزلكة تانية
كنت زمان بفكر في فكرة إبداعية بجد الكلام ده من 6سنين تقريبا
لو مثلا أقدر إني أشم ريحة البرفان من النت والفكرة جت لي من
برموشن كنت لما بمسح على صورة أزازة البرفان ريحته بتطلع
في إيدي فجت لي فكرة ليه مينفعش إني أختار البرفان اللي عاوزاه
من الشركات العالمية وأشمه وأجربه ـ بس مش هشتريه ـ ومن سنة
عرفت إنهم عملوا حاجة زي دي جهاز معين بيتركب بيعمل كدة
فكرت في اختراع جديد، عشان التدوينة دي تكون شاهدة عليا ومسجلة
اختراعاتي وفزلكاتي.. لو مثلا يعملوا برفان ـ خليه للأطفال عشان أتكلم براحتي ـ
ولو الطفل حط البرفان ومامته لفت حواليه بشكل دائري تشم ريحة معينة
ولو لفت حواليه بشكل مثلث مثلا تشم ريحة تانية ولو لفت بشكل مربع تتغير ريحته
وهكذا.. مع إنه هو هو نفس البرفان.. فكرة مطرقعة
23 أكيد في تعليق عايز تقوله:
هههههههههههه
ما شاء الله على الاختراعات الجامدة
طيب يا بنتى ما هما اخترعوا دلوقتى حاجة تركبيها فى هدوم طفلك لو بعد عنك بمسافة معينة تديكى إشارة على الموبايل
وبعدين لما نكبر بقه ونعجز ونبقه مدونين كبار فى السن مش عارفة حاسة ان ممكن ساعتها اكون فقدت حماسى للتدوين
فقر تدوينى ...مممممممممممممممم
تعرفى ان عندى كمية مواضيييع كتييييييييييير
بس هى النفس...محدش بقى طاايق حاجه ولا حاجه حتى بقت طايقه محد...عاتى عاتى
اول مرة اعرف انك عامله مدونة :D
هى كلمة السر اللى بتتقال بتعرف كل واحد :D
يعنى ايه كلمة وطن
سؤال محتاج من كل واحد فينا اجابة
شاركونى برايكم
قلب أبيض
هو الموضوع ده موجود عند كل الناس ده مشكلة مرضية فعلا يبدو أنه من الشيطان
عشان ربنا قال
الشيطان يعدكم الفقر
يعني يخوفكم الفقر
فالناس كلها بتخاف ماتلاقيش موضوعات طيب ماهو ساعتها يبقى مافيش مهمة
طيب ما هو الصمت فكر وحكمة
فعلا حلو اوى الاختراع دا
بس حكايه فقر التدوين دى معتقدش لان طول ما احنا عايشين طول ما هندون
سلامى لكى
سجدة
أنا عرفت فكرة الاختراع دي
وعجبتني جدًا.. بس لو كنت أنا مكان الاطفال كنت هتخنق.. ومش بعيد أكره أمي... ههههههههههه
أصل المشكلة إني لو حاولت ألعب بعيد شوية أو سولت لي نفسي إني أعمل مصيبة هلاقي أمي في قفايا عدل.. يادي الكارثة.. يااالا خير..
سفاح كرموز
فكرة إني مش قادرة أدون دي واردة
لكن مش عندي تدوينات دي استحالة..
المقصد من البوست ده إن كل الناس تتطلع اللي في قلبها بالتدوين حتى لو المود مش أد كدة للتدوين.. ممكن تدون الحالة اللي أنت فيها، أكيد هنطلع بأفكار وهنسمع كلام يحمسنا للتدوين مرة تانية..
ـــــ
أنا المشكلة اللي بعاني منها فعلا إني مش عندي وقت في الفترة الحالية للتدوين حتى تلاحظوا إن أغلبية بوستاتي وتعليقاتي بتبقى قبل الظهر عشان بعد كدة أنا مش ببقى لاقية نفسي من الشغل
بس أنا سعيدة كدة الحمد لله
أدعولي بقى..
سفاح كرموز.. تاني
هو حضرتك أول مرة تعرف إني عندي مدونة يعني حضرتك تعرفني ومتعرفش إني عندي مدونة؟؟
ولا أول مرة تعرفني أصلا وتعرف مدونتي؟؟
عصفور المدينة..
سبحان الله.. حضرتك جبت لي خاطرة جميلة جدًا..
إن الفقر مش فقر مال فقط فقر حاجات كتير..
أنا شايفة إن فقر المال مش بيبقى سببه المباشر المال.. أعتقد إن السبب فيه فقر الفكر في تدبر المال، يعني مثلا تلاقي واحد عنده مواهب كتير لكن مش عارف يستغلها وبالتالي فقير مادية والفقر نابع من الفقر الفكري في كيفية استغلال طاقاته..
وواحد تاني ممكن يكون أقل مهارة من الأول لكنه غني لأنه يحسن إستغلال طاقاته بالتفكير الجيد والتخطيط..
ومضة جميلة.. جزاك الله خيرا كنت سبب فيها فعلا سبحان الله
I passed to congratulate it with its work and to desire a good August to it in vacation.
التدوين زيه زي اي شئ الواحد لازم يمارسة علشان يقوي
زمان كانت فيه دكتورة في الجامعة بتقول لنا لو مشغلتش مخك للتعلم هيصدي و مش هتعرف تستعملة ... زي ما الرياضي كل ما بيمرن عضلتة و يضغط عليها بتديلة قوة و شغل مع الوقت
هو طالماالانسان موجود يبقي اكيد بيفكر و لو ملاقاش موضوع يبقي اي فكرة يفكر فيها يسجلها و فيه ناس ربنا بيلهمهم ماشاء الله افكار تستحق ان نتشارك فيها
دمت بكل الخير
عادي
ممكن تلاقي في فقر تدويني عند ناس و و بذلك يظهر ناس تانية ماكانتش ظاهرة على الساحة
مصائب قوم عند قوم فوائد
david santos
جزاكم الله خيرا على مروركم
شمس الدين
منورة ياشموسة
وتشبيهك جميل المهم نشجع بعض على الاستمرار
شرم
سنة الحياة.. هيجي يوم ونقول حسن الختام
بس مش هيكون الختام التدويني إن شاء الله
إفتكاسات بس ظريفة
ربنا يكرمك
وخصوصا موضوع فقر التدوين ده
وبالمناسبة إحنا لازم نستنى موضوع البرفان بتاع الأطفال
علشان نشوف بقى
وربنا يكرمك وتفتكسيلنا حاجة ظريفة تانية
bedo
كلها خمس سنين إن شاء الله وتلاقيه
أصل الأوروبيين دول مجانين
ده وصل بيهم الحال إنهم يطبعوا الحاجة ثري دي
يعني مثلا لو عجبتك كوباية على النت أو لعبة وعاوز تكون عندك دلوقتي كل اللي عليك تعمله إنك تدوس كنترول بي وهوب تلاقيها عندك..
تخيلوا.. على فكرة الحكاية دي مش فزلكة ده خبر قريته حقيقي
هههههههههههه
بجد عجبني اوي موضوع الفقر التدويني
ايه يابنتي الاختراعات دي ، مصر من غيرك ما تسواش
ربنا يخليكي لمصر
يا عينى وسايبينك كدة تخترعى على نفسك والله يا بنتى احنا خسارة ف البلد دى وبعدين فقر تدوينى الذاى بس ده الدنيا فيها عجايب ومصر ام الدنيا وعجايبها
تحياتى يا قمرة
تم افتتاح مدونات
4xmisr
لتعليم التدوين على بلوجر باحتراف
spot-weblog.blogspot.com
الثانية للتعامل مع الانترنت بأمن
4xpert.blogspot.com
(تحت الانشاء)
باقى المدونات للربح من الانترنت لمن يهتم بذلك
شاكرين لكم سعة صدركم مقدما
وأرجو التواصل معنا بابداء الأراء والتوجيهات شكرا
s
بيدو
عشان تعرفوا إن مصر مليانة عباقرة
بجد عباقرة وأنا أكبر دليل على العباقرة دول..
على فكرة في أوووربا والدول المتقدمة يُعد هذا إبداعًا
جميل جدا \
إرسال تعليق